tan jan Kapesi Pake
tenpo sike 2001 la, jan Wen Pitenten (Wayne Brittenden) li pali e sitelen pi nasin jan. sitelen ni li alasa e pilin pi nasin jan tan jan ali. sitelen ni la, jan Wen Pitenten li pali e wile sona mute mute mute tu (62) kin. jan li pini e wile sona ni la, jan li ken lukin e pilin ona lon sitelen pi nasin jan. toki Inli la, nimi pi sitelen ni li “The Political Compass.” sitelen ni li kepeken leko tu tu lon ona sama. leko ni li kule ante li sama nasin jan ante. leko pi laso sewi li pana e nasin lawa e nasin mani. leko jelo li pana e nasin ken e nasin mani. (sitelen majuna li kepeken leko pi loje laso, taso sitelen sin li kepeken leko jelo. kule jelo li pona lukin lon sitelen). leko pi laso kasi li pana e nasin ken e nasin sama. leko loje li pana e nasin lawa e nasin sama.
nasin lawa li ni: kulupu lawa o kama lawa o awen lawa e jan.
nasin ken li ni: kulupu lawa o awen lili. jan o awen ken. jan o awen lawa e ona sama taso.
nasin mani li ni: mani suli li pona mute. jan ali o kama jo e mani, taso jan pi mute ala o kama wawa e mani mute. kulupu lawa o lawa ala e tawa mani. jan li jo ala e mani la, jan ni li ken ala lon.
nasin sama li ni: mani suli li ike mute. mani o suli ala tawa jan. kulupu lawa o lawa e tawa mani. jan ali li ken jo e lon sama. jan pi mani mute li lon ala.
tenpo la, jan li ken pilin e ni: kulupu pi nasin awen li lon leko pi laso sewi, taso kulupu pi nasin ante li lon leko pi laso kasi. ni li ken lon, taso ni li lon ala lon tenpo mute. jan pi mute mute li kepeken sitelen pi nasin jan, taso ona li ike tawa jan mute. ona li ike tan ni: sitelen ala li ken poki e nasin jan pi jan ali. kin la, sitelen pi nasin jan li kepeken linja tu taso. taso, linja pi mute mute li lon! tenpo pini la, sitelen pi nasin jan li ike tawa jan ni tan kepeken. ona li pilin e ni: jan pi nasin awen li olin kepeken sitelen pi nasin jan. ona li pilin e ni kin: nasin awen li ike mute tawa jan, tawa ma, tawa pona.
tenpo ni la, jan li alasa ante e sitelen pi nasin jan. pali ona li lon e sitelen sin e nasin sin pi nasin jan. ona li “8values” li “8dreams” li “9axes” li “12wackies” li “SApply” li “Spekr” li mute mute. mi pilin e ni: nasin jan li musi mute tawa jan. ni la, nasin sitelen mute pi nasin jan li lon. ni li seme? ona li nasa li musi lili tawa mi. jan o pana ala e wawa tawa sitelen taso. nasin jan li suli li lon ijo ali. ona li musi taso ala. nasin jan li pali li pakala e lon pi jan mute. o pali e nasin pona e nasin olin tawa ali.
o kepeken wawa sina tawa pona kin. ken la, sina kepeken nasin ike lon tenpo pini. ken la, sina suli e ike sina lon tenpo pini. taso, o kama sona e nasin sin. o awen ala e ike pini sina. pilin li ken ante. nasin li ken ala. sina ken ante kin. o pona lon tenpo sin. o alasa pona kin. o pakala e jaki pini kepeken suwi pi tenpo kama. ni li nasin.