tan jan Kekan San
sina wile pona la o lipu e sona
sina lipu e sona ale sina la sina ken kama lukin e sona sina pi tenpo weka
taso, sina o ni tan seme? ni li pali suli la sina wile ala!
o kute.
sona pi lipu ni li ken tawa ale li ken pona e ale sina
tenpo la sina kama pilin ike tan moku. ni li tan tenpo suno poka li tan tenpo suno ni anu seme? ni li tan moku seme? sina moku mute la sina sona ala e moku ale lon tenpo ni. sina sona ala la ike a, sina ken ala weka e pilin ike!
sina ken ante e nasin moku sina. ni la sina weka e moku wan lon tenpo suli. taso, tenpo suli li weka la sina awen kama pilin ike tan moku, taso sina awen sona ala e moku ike.
o lipu e sona.
lipu la sina kama sona e ni: mi pilin seme tan moku seme?
sina ken lukin e
ipu tawa sona.
moku pi mute
lili li lon lipu la
sina ken weka
e ona taso. sina ken sona e ken ike lon open pi pilin ike!
ante la, sina kama sona pali. tenpo suli la sina ni, taso sina kama ala sona pali. ni li tan seme? sina pali mute tawa sona, taso sina awen sona ala. ni la, seme li pakala? sina toki e ni tawa jan sona, taso ona li sona ala pona e sina tan ni: ona li sona ala e nasin sina pi kama sona!
o lipu e sona.
lipu la sina ken lukin e kama wawa sina. sina ken pilin wawa tan ni! sina ken lukin e open sina e tenpo sina la sina ken sona e ante suli sina. sina ken ala sona lon tenpo la sina ken pana e sona lipu tawa jan ante, sina ken wile e sona tan ona: seme li pakala lon nasin mi? lipu la ona li ken sona li ken pona e sina.
mi lipu e sona tawa ni: mi sona e mi pi tenpo pini. mi lipu e pali e pilin e wile. mi lukin e ni pi tenpo weka la mi kama sona e ante mi e kama wawa mi. ni li wawa e mi lon tenpo suli la mi pilin wawa a lon ale wile lon tenpo suli weka!
nasin lipu li suli ala. sina ken kepeken ilo toki, sina ken kepeken lipu kepeken ilo sitelen. ale la, o lipu e sona tawa pona sina.