nasin telo suli Nile li nasin telo lon ma Apika. toki mute la, ona li jo e nimi mute: open la, nimi “Nile” li tan toki Elena. toki Elena la, nasin Nile li jo e nimi “Νεῖλος Neilos”. toki Lasina la, ona li jo e nimi “Nilus”. nimi ante mute li lon, taso tenpo ni la, ma mute lon poka pi nasin telo Nile li toki e toki Alapi. toki Alapi la, ona li jo e nimi “النيل an-Nīl”.
nasin telo ale la, nasin telo Nile li suli a. ken la, suli la, nasin Nile li nanpa wan anu nanpa tu. ken la, nasin telo Amasona li nanpa wan. nasin Nile li jo e nasin open tu: nasin Nile laso en nasin Nile walo. nasin Nile walo li nasin suli, li jo e telo lili. ona li open lon ma Pulunsi (Burundi), lon ma Wanta (Rwanda), lon ma Tansanija (Tanzania). open ante la, ona li open lon telo suli Witowija (Victoria) lon ma Ukanta (Uganda). nasin Nile laso li open lon nena pi ma Itopija (Ethiopia, ኢትዮጵያ). nasin telo lili mute li tawa telo Tana (ጣና ሐይቅ, Lake Tana). nasin telo li tawa tan telo Tana, li telo Sisisa (ጥስ እሳት, Blue Nile Falls) pi tawa anpa. nasin Nile laso li nasin lili, li jo e telo suli.
nasin telo suli Nile li tawa lon insa pi ma ni: ma Pulunsi, ma Wanta, ma Tansanija, ma Ukanta, ma Sato Sutan (South Sudan), ma Sutan, ma Itopija. ma Masu (Egypt). ona li pini lon telo suli Mesitelane.
kala mute li lon nasin Nile. taso kala mute ni li lon telo ante kin. kin la, soweli mute li jo e nimi “Nile” tan nasin telo Nile: soweli suli Nile anu akesi Nile.
nasin telo Nile li jo e wawa mute. jan li wile ilo e wawa ni. ni la, jan li pali e sinpin pi pana wawa mute. ona mute li lon ma Masu li lon ma Sutan, li lon ma Ukanta. taso ma Itopija li wile pali e sinpin suli sin. tenpo ni la, sinpin lon ma tomo Asuwan (أسوان) li suli a. taso sinpin suli pi ma Itopija li jo e wawa tu wan pi sinpin Asuwan, li open lon tenpo kama lili.
nasin telo Nile la, nasin telo pali mute li lon. kin la, nasin mute li lon sewi pi nasin telo Nile. ma suli lon nasin telo Nile li ma Kesila lon ma tomo Kajela (القاهرة, Cairo). ma tomo ante lon poka pi nasin telo Nile li ma tomo Ikantalija (الإسكندرية), li ma tomo Kise (الجيزة), li ma tomo Katun (الخرطوم). ma tomo Katun li ma tomo lawa pi ma Sutan.
