tan jan Kapesi Pake
ni li toki pi nasin jan. o sona e ni: lipu ni la, mi toki e nasin jan mute e nasin lawa mute. mi toki lili e pakala jan e moli jan. ni li ken ike, taso ona li sona suli kin.
ma pi nanpa mute la, nasin mani li lon li nasin jan nanpa wan. nasin mani li sama ni: nanpa wan la, jan li ken lawa e ma ona. nanpa tu la, jan li wile e ijo la, jan o esun e ijo ni. nanpa tu wan la, nasin esun li suli tawa jan ali. ni la, kulupu mani o utala esun. nanpa tu tu la, jan li jo ala e mani la, jan li ken ala lon pona. nanpa luka la, jan li wile jo e mani la, jan o pana e pali ona e tenpo ona tawa jan ante. nanpa luka wan la, mani o kama sama mute mute. nanpa luka tu la, mani en ijo ali li kama taso tan nasin pali. nanpa luka tu wan la, jan pi nanpa lili li lawa e nasin pali.
jan pi olin pi nasin mani li toki e ni: “nasin mani li majuna mute. nasin mani li nasin nanpa wan lon tenpo ni, lon tenpo ali. nasin jan ante li ken ala pana e pona sama.” taso, ijo ni li lon ala lon? ken la, nasin mani li majuna. jan li ken toki e ijo mute pi pini pi nasin mani. taso, nasin jan ante li majuna kin li suli kin. ma mute la, jan ali li kepeken ma lon tenpo pi pini mute. jan ali ni li kama kulupu. ni li nasin kulupu. tenpo mute la, nasin mani en nasin kulupu li lon. tenpo sike 1760 la, ante suli pi nasin pali li kama. tenpo sike ni la, jan li kama mama e kasi kepeken tenpo pi nanpa lili, kepeken wawa ala. jan mute li pilin e ni lon tenpo pini: “ante suli ni pi nasin pali li pona suli. ante ni li ken lon e mani sin mute!”
ante li lon e mani sin. taso, mani sin ni li tawa jan pi nanpa lili taso. jan mute la, pali jan li ante, taso mani jan li ante ala. tenpo pi pali jan li awen suli li kama lili ala. nasin pali li pali e ijo mute, taso jan seme li ken kama jo e ijo ni? ike pi nasin pali ni li awen ike. nasin mani li awen pakala e ma e jan kepeken nasin pali. ike ni li seme?
nanpa wan la, nasin mani li weka e jan tan pali jan ona. pali jan o tawa nasin mani taso. ni la, jan li sama ilo, li sama ijo lili lon ilo suli.
nanpa tu la, nasin mani li pana e pilin jaki tawa jan pali. jan li sama ilo la, ilo li ken sama jan. ijo ali li ken weka e ken pali pi jan pali. ilo ante anu jan pi ma ante li ken lon e mani namako la, jan pali o weka. ni li suli e pilin jaki ona.
nanpa tu wan la, nasin mani li suli e kipisi mani. mani pi jan pi mani mute li kama suli. taso, mani pi jan pi mani lili li awen lili.
nanpa tu tu la, nasin mani li ken kama pakala kepeken tenpo lili. tenpo mute la, mani pi nasin mani li tawa ala. kulupu pi nasin mani li pali e ijo namako pi mute ike. ni la, pali li kama weka. pali jan li kama weka. jan o wile ala pali. taso, nasin mani la, jan li pali ala la, jan li moku ala.
nanpa luka la, nasin mani li ike kin tawa jan pi nasin mani. jan pi mani mute li pilin ike kin lon tenpo mute. nasin mani la, olin li sama esun. nasin mani la, jan o sewi e esun e mani. nasin mani la, jan o alasa taso e mani sin e ijo ante ala.
ma mi la, jan majuna en jan lawa li toki sama li toki e ni: “nasin kulupu li ike! tenpo ali la, nasin kulupu li kama sama nasin pi lawa suli li kama pakala e ken jan ali! nasin kulupu la, jan ala li jo e mani! sina wile e nasin kulupu la, ma sina li ike mute tawa sina! ni la, sina ike mute kin!” toki ni li musi tawa mi. taso, ona li toki powe. mi kama sona e ni: jan li ken toki e ike ken pi nasin kulupu, taso ike ni li lon nasin mani lon tenpo ni. nasin kulupu li ken lon kepeken ijo mute. nasin kulupu ali li sama ala.
nasin mani li toki powe kin tawa jan. ona li toki e ni: “sina pali ala la, sina ike taso. sina jo e tenpo mute pi pali ala la, sina o apeja. sina jo e ijo mute la, sina ken pilin e pona mute. sina jo e mani mute la, sina jan pi pona taso.” nasin mani li toki powe tan ni: powe pi kulupu jan li nasa e lon.
ike ni li lon. ni la, ijo seme li ken pona e ona? jan pi nanpa mute li toki e ni: “kulupu lawa o ante. nasin lawa li ante la, nasin jan en nasin ante ali o kama pona.” tenpo la, nasin lawa en nasin jan li nasin ante tu. kulupu lawa li ken kepeken nasin lawa, taso jan li ken lon nasin jan. kulupu ni la, nasin ni li sama ala. nasin lawa li ike tawa jan la, jan li wile e nasin lawa seme?
jan pi nanpa ala li pilin e ni: “nasin mani li pona, taso lawa ali li ike mute.” ni la, jan ni li wile e nasin mani pi lawa ala. ona la, nasin mani li ken kama pona la, lawa li kama sama ala. taso, nasin ni li nasa mute. lawa li ala la, nasin mani li ken lon tan seme? nasin mani li lawa wan. nasin mani en lawa ante li lon ala la, jan li mani ala li ken lon kepeken seme? kulupu lawa li ala la, ijo kulupu li kama pakala. kepeken seme la, jan li ken moku? kepeken seme la, jan li ken jo e ilo kulupu? jan ali o pali tawa jan ante pi nanpa lili. nasin mani pi lawa ala la, kulupu lawa li ala. taso, kulupu mani li kama sama kulupu lawa. mani li kama suli suli, taso pakala jan li awen ike.
nasin ante li weka e nasin mani e nasin lawa kin. ona li nasin kulupu pi lawa ala. nasin pi lawa ala en nasin pakala li sama ala. nasin pi lawa ala li wile e ni: jan ala li lawa e jan ante. kulupu lawa li lawa ala e jan kin. jan ali li lawa taso e ona sama. nasin pakala li wile e ni: jan mute en sijelo jan mute li kama pakala. utala jan mute li lon ma kin.
nasin ante ni li lon kin. nasin awen li wile pake e ante ali, li wile awen e nasin mani. nasin pi wawa ma li wile e ni: kulupu wan o sama kulupu lawa. tenpo pini la, nasin Pasi li wan e nasin pi wawa ma e nasin kulupu powe. nasin Pasi li toki e ni: “nasin mani majuna li ike! nasin kulupu majuna li ike kin! ni li nasin sin tawa tenpo sin.” nasin Pasi li anpa e jan tawa kulupu, li anpa e kulupu tawa kulupu lawa. taso, nasin Pasi li pona ala e ijo, li weka e ken, li suli mute e utala e moli jan.
ken la, nasin pona li ken kama lawa. jan pi nanpa lili li lawa e nasin pali. nasin pali li lon e mani ali lon nasin mani. jan pali li kama lawa e nasin pali la, ona li ken ante e nasin ona. taso, ni li ken ala ken kama lon? lon la, utala mani en kama pi nasin ante o lon kin. jan li sitelen e utala ni e ante ni lon lipu nasin. jan mute li sitelen e lipu sama. jan ni wan li jan Kawa Ma. sitelen ona li toki e utala mani pi jan Polatelija pi jan Puwasi. jan pali li sama jan Polatelija. jan pi lawa pali li sama jan Puwasi.
jan Kawa Ma li wile e ni: jan pi nanpa lili o lawa ala e ma e nasin pali. jan pi mani mute o pana ala e mani ona ali tawa jan lili ona. jan li kama jo e mani mute la, jan ni o pana e mani mute tawa kulupu. kulupu taso o lawa e tomo pi lawa mani e tomo pi lawa tawa. jan li wile kama sona kepeken tomo sona la, jan o pana ala e mani. jan Kawa Ma li toki e ni: “jan pi pilin sona li wile lukin taso e ma. ma pona la, jan pi sona pona o ante e ona.”
jan o sewi ala e jan Kawa Ma. ona li jan taso. toki ona li pona taso ala. jan o lukin e nimi pi jan ante kin. taso, kon pi nimi ni li awen suli. ma li kama pona la, nasin pi tenpo ni o ante. ni li ken kama lon anu seme? jan pali li ken ala ken kama lawa e nasin pali? nasin kulupu li ken ala ken anpa e nasin mani? mi la, wile sona ni li lili. ali o moli kepeken tenpo. nasin ali o moli sama. mi wile sona e ni taso: mi pana tawa moli ni, tawa ante ni, tawa pona ni, anu seme?