toki pona

toki pi kulupu ni li wile pona. ni la nanpa li ken nasa e pona toki e sona kute e wile insa. ni la mi pi toki pona li wile ala toki e nanpa suli. mi wile toki e mute suli taso. ante li seme? nanpa li pana e suli sama tawa sona pi mi ale. taso mute li pana e suli tan pilin mi. a, lon la toki pona li ken toki e ijo ale li ken toki e nanpa. kin la jan mute li awen wile toki e nanpa e nanpa suli tan musi anu alasa anu nasa anu nasin anu wile anu pilin.nanpa li lili la ale li ken sona e sona pi nanpa toki. ala en wan en tu li pona toki li pona kute li pona sona. taso nanpa li kama suli la nasa li ken kama. lipu pi jan Sonja li pana e nasin tawa nanpa suli. luka en mute en ale li nanpa suli li ken lon poka pi nanpa ante li ken kama suli mute. toki pi nanpa ni li wile e kute wawa e lawa wawa e sona nanpa pona kin. tan ale ni la pilin mi li ni: nimi nanpa li wile pana e pilin sama suli ona la mute nimi li suli e tenpo toki. ni li pona tawa mi. nanpa li suli la tenpo toki o suli. ni li nasin pi toki pona li sama ala toki ante pi sona mi. taso mi pu la mi sona e ijo ante kin. nanpa li kama suli la tenpo toki li kama suli, li kama ala suli pi mute ike a. ni li lon. taso nanpa li suli suli la toki li kama ala suli suli. nanpa li suli suli la toki li kama suli pi suli mute ike.mi toki e ijo ale ale ale ale ale ale ale ale ale ale ale ale ale ale ale ale ale ale ale ale mute tu wan la jan li ken sona e nanpa ni lon lipu li ken sona ike anu sona ala e nanpa ni lon kute a. tan suli ike ni (anu pilin ante) la jan mute li pali e nasin nanpa sin mute. taso nasin ni mute li pona ala tawa pilin pu mi. pona la jan Tepo en jan Kapilu li pali e nasin nanpa pona (li pana e nimi ona sama: nasin nanpa pona). suli ike pi nasin nanpa pu li tan nimi “ale”. wan li kama mute la ona li kama tu. tu li mute la ona li kama luka. luka li mute la ona li kama mute. mute li mute la ona li kama ale. taso ale a li kama mute la ona li kama ala ante. ona li mute la ona mute li lon nasin pu. ale en ale en ale en ale li lon la ni li ale ale ale ale. nasin nanpa pona pi pu ala li ante e ni. ale li mute la mute ona li ken lon nanpa. ale en ale en ale en ale li awen ken ale ale ale ale, li ken tu tu ale kin. nimi “ale” taso la ni li ken. mute pi nimi “ale” li kama mute sama nanpa ale la nimi “ale” sin li kama: nanpa 2 22 22 la ni li ken tu ale mute tu ale tu tu. seme la ni li ken pona… mi toki e nanpa pi suli ni lon tenpo seme… a ijo mute li ken, taso mi la nanpa li kama suli lon ijo wan lon tenpo mute: mi toki e tenpo la tenpo pi sike suno li mute a. nasin nanpa pona la mi ken toki e tenpo pi open pu: tenpo sike nanpa mute ale luka luka tu tu. mi ken toki e ko pi seli utala - ona li tan ma Sonko li ken pana e kiwen lili kepeken wawa suli li kama lon poka pi tenpo sike nanpa luka tu wan ale. lon la mi ken toki e mute mani e suli ma e suli weka e suli pi tawa mi e mute jan pi ma wan e mute mun e soweli suwi pi wile mi e moku suwi. taso awen la mi wile ala toki e nanpa lon tenpo mute. mi wile toki e mute.