Categories
toki toki musi

toki tu

o lukin – sitelen ni li pana e toki tu – nasin pi toki nanpa wan la sitelen lili 「,」 li pini e toki wan li open e toki sin – o lukin ala e sitelen lili 「‘」 – nasin pi toki nanpa tu la sitelen lili 「‘」 li pini e toki wan li open e toki sin – o lukin ala e sitelen lili 「,」 – ni pi nasin tu li musi ala musi tawa sina

jan lili li awen lon tomo lon tenpo’ ale la ona li pilin musi’ ala li wile pini e ni’ ike, ala li kama’ ante li pana e pilin, pona la waso li mu li mu li mu’ taso, ona li kama, toki li ante tawa pilin jan, kute’ mu li lon, nasin toki li sama toki li toki, mu’ waso li toki’ ala li sama ni lon tenpo ale

ma li lon selo, tomo li pona tawa jan’ ni li awen lon sona ona tan mu waso

Categories
toki toki musi

monsuta li lon

tan jan Penta

jan li kama, li kama lukin e sitelen nimi · sitelen nimi li jo e nimi mute, e nimi jan · nimi ni li ni : 「o weka! o weka! monsuta li lon!」 jan li wile sona e kon pi sitelen nimi · jan o tawa kulupu tomo lon poka tan ni · jan li tawa · jan li kama · kama la, jan li lukin e soweli mute · ona li loje li jelo laso · noka ona li tu tu · len linja selo ona li palisa sike · ona li kepeken kasi lili · ona li moku e kasi sama · soweli mute ni li pona · taso jan li kama la, soweli li tawa weka kepeken wawa ·

jan li lon la, soweli mute ni li pana e mu ike · 「mu! mu! mu!」 mu ona li kalama suli, li kalama taso pi ken kute · jan li sona ala e mu ike · jan li kute ala e kalama sama ni lon tenpo pini · jan li toki insa : 「soweli ni li nasa · nasa ona li tawa nasa, li mu nasa · mu li toki ona · mu ona li mu pi pilin pakala · kon pi mu ni li seme?」

soweli li tawa monsi · ma monsi li ma pi kasi mute · kasi li suli, li len pona e soweli · monsi li lon · taso ma sinpin li lon kin · kulupu tomo li lon ma sinpin · tomo li suli linja · selo pi tomo ni li kiwen, li pimeja walo · sinpin kiwen li lon poka pi kulupu tomo · ilo jan li lon kin · ijo jan li ilo, li jan, li kiwen, li tan jan ante · ilo jan li pali e seme? jan li wile sona e ni ·

soweli ante li lon kulupu tomo · taso ilo jan li alasa e soweli · ilo jan li luka kin e soweli · sinpin pi soweli ni li pilin monsuta · ona li pana e mu ike kin · ilo jan li tawa e soweli tawa tomo kiwen · tomo kiwen la, jan li lukin e ijo · jan li kama toki insa a : 「ni li seme? ijo seme li lon insa pi tomo kiwen?」 jan li kama sona · seli li lon insa pi tomo kiwen · ilo jan li weka e soweli · ilo jan li pana wawa e soweli tawa seli · seli li moli seli e soweli · mu ike mute li kama lon · taso mu ni li pini ·

jan li kama pilin monsuta · jan li wile sona e ni : soweli li moli tan seme? soweli o moli tan seme! ona li moli tan ni :  jan mute li wile moku a e soweli · jan pi moku soweli li wile e soweli moli tan wile moku ona · seli li seli e soweli tan ni · ma en kasi li tawa nasin ni taso · ilo jan en tomo kiwen en kulupu tomo en wawa ni li tawa nasin ni taso · soweli li wile lon · soweli li wile ala moli · taso soweli li ken ala awen · ala li awen e soweli · wile moku ali li pakala e wile pona ale · jan pi ma ale li pilin e ni taso : 「mi ken ala lukin e moli soweli la, moli soweli li suli ala! ilo jan en jan ala li moli e soweli la, ali li pona! moku mi li ijo nanpa wan! a! a! kin la, jan pi moku soweli ala li jan pi nasa mute!」

jan li pana e kalama ike tan uta · jan li pana e telo lawa tan oko · jan li lukin e tomo kiwen ale, e pakala soweli ali · lon ni li lon · lon ni o lon · jan li lon e lon ni taso · monsuta o lon kin · sitelen nimi pi ma ni li jo e kon wawa · sitelen nimi li wile taso e ni : soweli o weka, o weka tan jan · jan li kama sona · jan li ken ala sona ala · jan o sona e ni : jan li monsuta ·