Categories
sona toki

sike kon

jan li wile tawa sewi. taso jan li waso ala. ma Sonko la, jan li tawa sewi kepeken lipu sewi. taso tawa kon li lon ala la, jan li ken ala ni.

ilo ante pi tawa sewi li lon: sike kon. nanpa wan la, jan li pali e sike kon lon ma Sonko. ma Elopa la, sike kon li lon tenpo kama mute. nanpa wan la, jan sama tu Monkope (Montgolfier) li pali e sike pi kon seli. soweli en waso li tawa kepeken sike ni. tenpo sike sama (1783) la, jan Sale (Jacques Charles) li wile pali e sike kon. ona li kepeken ala e kon seli, li toki tawa jan sama tu Kope (Robert). ona li pali e sike kon pi kon telo.

taso nanpa wan la, jan li tawa sewi kepeken sike kon pi jan tu Monkope. jan Sale en jan sama tu Kope li pali e sike sin pi kon telo. nanpa tu la, jan li tawa sewi kepeken ona. tenpo kama la, jan Pansa (Blanchard) en jan Sepi (Jeffries) li tawa ma Juke tan ma Kanse kepeken sike kon. ike la, jan li ken ala ante e nasin pi sike kon ni. taso jan Sipa (Giffard) li kepeken e ilo tawa. taso ilo tawa ni li ike. kama la, jan Enlan (Haenlein) li kepeken e ilo tawa sin, li ken lawa pona e sike kon.

tenpo sin (2002) la, jan Pose (Fossett) li sike e ma kepeken sike kon, nasa a!

Categories
sona toki

musi palisa

tan jan Masine

tenpo pini la mi tawa ma Somi (Suomi). tenpo open la mi sona lili e ma Somi, taso mi kama sona mute tan ona lon tenpo mi pi ma ni. tenpo suno wan lon tenpo lete la mi lukin e ijo. ona li pona lukin li nasa lukin tawa mi. ijo ni li jo e sinpin mute. jan li pali e ona tan palisa kasi tan linja. mi sona ala e kon ona. mi toki e ni tawa jan pona mi: “ijo ni li seme?”

ona li toki e ni: “toki Somi la ni li ‘himmeli’. jan li pali e ona lon tenpo lete tan ni: ona li pona tawa ona. taso tenpo pini la ona li pali e ona tan ni kin: ona li pilin e ni: musi ni li tomo tawa kon kasi. kon kasi li lon tomo ni la ona li pilin pona li pana e kasi mute tawa jan lon tenpo sike kama.”

mi toki e ni tawa jan pona mi: “ona li pona lukin. mi wile pali e ona kin”. jan pona mi li toki e nasin pali tawa mi. mi pali lon poka ona. sina wile pali e ijo ni kin la o lukin e nasin lon anpa pi toki ni. (nasin ante li lon. wile sina la sina ken pali e ijo palisa pi sijelo ante mute, taso lon ni la mi toki tan nasin wan pona taso tawa ni: jan li ken pali e ijo palisa lili.)

pali nanpa wan: o alasa e palisa. kasi tan ma telo la palisa ona li pona tawa ni. taso sina ken kepeken kasi lili tan ma sina. ona o jo e lupa lon insa ona. sina wile ala anu ken ala kepeken palisa kasi la o kepeken palisa pi sijelo ante. sina kepeken e palisa kasi la o awen e weka telo tan palisa sina. ni li ken wile e tenpo suli.

pali nanpa tu: o kipisi e palisa. ni la sina kama jo e palisa luka luka tu pi suli sama. (jan li toki e ni: nanpa palisa li luka luka tu tan ni: mun pi nanpa sama li lon sike suno.)

pali nanpa tu wan: o jo e linja suli. o linja e palisa tu wan.

pali nanpa tu tu: o wan e palisa nanpa wan e palisa nanpa tu wan. ni la sijelo pi sinpin tu wan li lon. ona li ni lukin:|

pali nanpa luka: o linja e palisa tu o pali e sijelo sin pi sinpin tu wan lon linja palisa. ona li ni lukin:

pali nanpa luka wan: o awen pali e pali nanpa luka tawa tenpo ni: sina jo e sijelo luka pi sinpin tu wan en sina jo e palisa wan taso lon linja ala. pona la linja sina li jo e lukin ni:

pali nanpa luka tu: o linja e palisa sin o wan e ona tawa open linja.

pali nanpa luka tu wan: ma tu la palisa tu taso li linja. o linja sin e pini sijelo ona. sina kama jo e musi palisa lili!

wile sina la o ken pali e sijelo ni mute pi suli ante mute o wan e ona. musi pona!

Categories
sona toki

nasin seme la, ko lete walo li kama tan sewi?

mi kama lon tenpo lete. ma sina li weka a tan ma mi la, seli li ken lon ma sina. taso sina lon ma mi, anu ma poka, anu ma pi kon sama la, tenpo lete li kama open.

telo li ken tan sewi lon tenpo seli, li ken tan sewi lon tenpo lete. taso lete la, telo li ken kama kepeken nasin ante a. telo li kama tan sewi lon tenpo seli la, ona li telo lon open, li telo lon pini. taso lete la, telo li ken kama kiwen. ona li kiwen lon open la, ona li ken kama telo lon pini, li ken awen kiwen. kiwen la, ona li ken tawa anpa kepeken wawa, li ken pana e pilin ike lon selo mi.

taso kiwen en telo la, ko li lon insa. lete la, telo li ken kama nasa, li ko lon open, li ken awen ko lon pini, li walo. nasa musi. ona li awen ko la, ona li mute la, ona li ken walo e ale ma, li ken len e nasin ale, e supa ale, e kasi ale. ni li ken suwi. ko pi mute pona li awen la, jan li ken jo luka e ko, li ken kama e sike wan tan ko. jan li pana wawa e ona tawa jan ante la, jan mute li ken utala musi. jan li tawa e sike lon ko walo sin la sike li ken awen kama suli. jan li pana e sike suli wan tawa sike suli ante la, sike mute li ken sama sijelo. sijelo pi ko walo la jan li ken pana e len, e namako kin. lon nena suli la, jan li ken tawa anpa kepeken ala noka kepeken ala ilo wawa. ona li wile e supa taso. ko lete la, tawa li kama pini kepeken tenpo suli taso. ni ale a li ken musi. pakala kin li ken la o tawa kepeken nasin pona a.

telo li seli pona, li lete pona la, telo li telo. ona li lete la, ona li ken kama kiwen. ona li seli anu lon selo telo la, ona li ken kama kon. kon telo li tawa sewi. taso sewi li lete. ni la, kon telo li awen ala tawa sewi, li awen lon sewi. awen ni la, kon telo mute li ken kulupu, li kama walo, li ken len e sewi.

lete pona la, kon telo pi len ni li ken kama wan lon kiwen lili anu ko lili, li kama telo lon tenpo sin, li tawa anpa. taso lete li wawa la, ona li telo taso ala, li kiwen kin. taso ona kiwen li kiwen lili. ona telo lili poka li kama lon ona kiwen, li kama kiwen lon ona kiwen la, ona li kama kiwen pi suli lili. ni li wile e tenpo. kiwen la, kon kin li lon insa. ni la, kiwen ni li ko. suno li tawa ona la ko li pana ala e kule. suno li ken awen tawa kepeken nasin sama, li ken kama tawa weka kin tan ko. ni weka li kama e walo taso. ni pi awen tawa li kama e kule ante ala. telo li tawa anpa kepeken tenpo lili. taso ko walo li tawa anpa la, ni li ken wile e tenpo suli, anu tenpo pi suli mute.

ko lete li kama anpa tawa mi kepeken tawa nasa musi la, mi alasa e ona kepeken uta mi lon tenpo pi open ona. lete li pona ala tawa mi. taso ko pi toki mi li musi. ike la, jan li awen seli e ma ale. ni la, ko li kama ala lon tenpo mute, li kama lili. tenpo pi ko nasa musi o kama lon poka mi a.

Categories
sona toki

jan li toki e wile ona lon ma Netelan

tan jan Kasape tan jan Simiman

lawa pi ma mi li wile kama sin · tan ni la jan mute li kama toki e wile ona tawa ma · ike mute li lon ma · ma o pali e seme tawa ona · jan li toki e wile ni ona · kulupu mute li wile e nasin ante · mi toki e ike mute ma e wile pi kulupu mute lon lipu ni · taso mi toki ala e ike ali e kulupu ali · ijo li lon lipu ni la ona li suli lon tenpo utala · kulupu mute li utala tawa ni: jan ma li wile e ona ·

o sona e ni : lipu ni la mi toki e nasin pi kulupu mute · mi toki e ona tan ala ni : ona li nasin mi · mi toki e ona tawa ni taso : sina ken sona e ma mi ·

ike seme li lon ma

tomo li lili · taso jan li mute · tan ni la jan mute li ken ala lape lon tomo · ni li ike · kon jaki mute li lon ma · ona li pakala e kasi mute · ni li ike · jan mute li kama lon ma mi tan ma ante · ma mi li tomo ala e jan ni ali · ni la jan sin li lape lon kasi lete lon ala tomo · ni li ike ·

jan li wile pali e seme tawa ike ni

kulupu ale li lukin li sona e pakala ma · kulupu ale li toki sama ni : ‹nasin mi li pona a · o pana e wile sina tawa mi la ale li kama pona lon ma Netelan› · taso kulupu ale li wile lawa li wile pali kepeken nasin ante · kulupu suli li toki e seme ·

kulupu waso (PVV)

‹ma pona mi li jo e jan mute · jan sin mute a li kama · taso ma li ken ala jo e ona ali · tan ni la jan sin o kama ala · ma li pana e mani suli e tomo tawa jan pi ma ante · taso jan pi ma mi li ken ala esun e tomo wile ona · ni li ike suli · jan ante mute li suli lon ma mi · taso sin la ma Netelan o tawa jan Netelan› ·

kulupu laso pali (GL-PvdA)

‹pali jan o kama e mani · lon tenpo lon la jan li jo e mani lili taso la ma li pana e mani suli tawa ona · taso jan ni li pali la ona li kama jo e mani lili taso · ni li nasa a · pali o pana e mani suli tawa jan · ni la ma li ken pana e mani lili tawa jan · kin mi o pana e mani suli tawa ni : kasi ma li awen pona› ·

kulupu esun (VVD)

‹ma Netelan li pona · pona li tan ni : jan esun li ken pali e wile ona · ni la esun suli o pana e mani lili tawa ma · ni la ona li ken esun wawa li ken awen wawa e ma · nasin ni la ma li wile ala e kulupu lawa suli · lawa li lili la jan li ken kama e wile ali ona› ·

kulupu pi wile sin (NSC)

‹jan lawa li toki e wile ona tawa jan ali · taso lon tenpo mute la ona li pana ala e toki ona tawa kulupu · tan ni la ala li ken oko e pali ona e wile ona e nasin ona · ni li ike suli · tomo o open tawa kulupu · jan ali o ken sona e nasin lawa› ·

jan ma li wile e seme

ma li kama sona e ni : jan mute li wile e nasin pi kulupu waso · kulupu ni li kama suli a · kulupu tu wan ante li kama suli lili · taso kulupu mute ante li wile ala pali e nasin pi kulupu waso · tan ni la tenpo toki suli li kama · kulupu ali li kama toki e wile ali ona · kulupu mute o kama wan · ni la ona li ken lawa ma ·

Categories
sona toki

kasi Kawa en telo Kawa

ma mute la, telo Kawa li suli mute tawa jan. taso jan mute ala li sona e tenpo pini, e ma open pi kasi Kawa. mi o pana e sona ni.

tenpo pini

kasi Kawa li tan ma Kapa (Kaffa). ma Kapa li ma lili lon ma Isijopija (Ethiopia, ኢትዮጵያ Ityop̣p̣əya). ona li lon ma Apika. tenpo pini mute (~900 AD) la, jan li kama sona e kasi Kawa. ken la, nimi pi kasi Kawa li tan ma Kapa. toki sewi la, soweli len li moku e kasi Kawa la, jan mama ona wan (jan Kali “Kaldi”) kin li moku e kasi Kawa. ni la, ona li wile lape ala, li pilin wawa! kama la, ona li pali e telo tan kasi Kawa: telo Kawa.

tenpo kama la, jan Alapi li kama jo e kasi Kawa, li moku e ona. ona li esun mute e kasi Kawa tawa ma ante. ma tomo pi esun mute li ma tomo Moka (المخا, Mocha) lon ma Jamanija. nimi pi telo Moka li tan ma ni.

kama (~1600 AD) la, telo Kawa li kama lon ma Elopa. ma Elopa la, ona li tawa ma Amelika, tawa ma Intonesija (tenpo pini la, ma Netelan li jo e ma Intonesija). tenpo ni la, jan li moku e telo Kawa lon ma ale.

nimi

nimi Kawa li tan toki Alapi. toki Alapi la, tenpo pi kasi Kawa ala la, telo Kawa (قهوة, qahwa) li telo nasa loje. toki Alapi pini la, telo Kawa li telo ale pimeja. telo Kawa li kapesi (loje jelo pimeja). toki Alapi li pana e nimi Kawa tawa ma Tuki. toki Tuki la, telo Kawa li jo e nimi ni: “kahve”. toki Tuki li pana e nimi ni tawa toki Italija (“caffè”), tawa toki Netelan (“koffie”). toki Inli la, telo Kawa li ni: “coffee”.

esun

tenpo ni la, kasi Kawa mute ala li kama tan ma Isijopija anu ma Alapi. jan li suli e kasi Kawa lon ma ni: ma Pasiju li nanpa wan, ma Wije li nanpa tu, ma Intonesija li nanpa tu wan, ma Kolonpija li nanpa tu tu. taso ma Isijopija li nanpa luka. kasi Kawa mute li tan jan kasi pi esun lili!

ma ale la, ma ni li moku mute e telo Kawa: ma Sumi, ma Nosiki, ma Isilan, ma Tansi, ma Netelan. tenpo suno ale la, lon ma Sumi la, jan li moku e poki tu wan anu tu pi telo Kawa.

kasi

kasi Kawa wan li sama ala kasi Kawa ante. suli la, kulupu kasi Kawa tu li lon: kulupu Alapika (Coffea arabica) en kulupu Loputa (Coffea robusta anu Coffea canephora). kasi Kawa Loputa mute li lon ma Apika pi pini suno, lon ma Ukanta, lon ma Intonesija, lon ma Wije. kasi Kawa Alapika mute li lon ma Amelika seli, lon ma Isijopija. taso ma mute la, kasi Loputa en kasi Alapika li lon.

kasi tu li sama mute. ona li suli a sama jan tu (ken la, jan tu wan!). ona li jo e lipu laso. lipu ona li suli sama luka. kasi unpa pi kasi Kawa li walo. poki kili Kawa li sike lili loje. insa poki kili la, kili tu li lon. open la, kili ni li laso walo anu jelo walo.

telo

sina wile moku e telo Kawa la, nasin pali mute li lon. sina ken moku e telo seli, e telo lete. sina ken pana e namako suwi. suli la, telo ni li lon:

telo Kawa pimeja li jo ala e telo walo (anu telo mama). ken la, namako suwi li lon ona. telo Esepeso (Espresso) li lili. taso ona li wawa mute. utala suli nanpa tu la, jan Mewika li lon ma Italija li moku e telo Espeso, li toki e ni: telo Esepeso li wawa a, li ike! ni la, ona li pana e telo. telo sin ni li telo Amelikano (Americano).

sina pana e telo walo la, telo ni li lon: telo walo en telo Kawa li kama wan li telo Kawa Late (Latte). sina pana e telo walo kon kin la, ni li telo Kapusino (Cappuccino). sina pana e telo walo ko kin la, ni li telo Makijato (Macchiato).

sina pana e telo kiwen lete la, telo Pape (Frappé) anu telo Late lete (Iced Latte) li lon.

ma ante la, telo Kawa ante li lon. ma Tuki la, telo Kawa Tuki li lon. telo Kawa Tuki la, jan li pana e namako. kin la, telo Moka li lon. toki mute la, nimi li nasa. ni la, mi pini lon tenpo ni. o awen pona, o moku pona e telo Kawa!

Categories
sona toki

ma anpa pi ma tomo Paki

tan kiki Kijana

ma li lon anpa pi ma tomo Paki (Paris) • kepeken lupa ma taso la sina ken kama lon ona • taso ona li seme li lon tan seme •

open la ma ni li ma moli a • jan li moli la jan ante li pana e ona tawa ma ni • jan mute mute mute a li kama moli lon ma Paki lon tenpo pini la ma ni li kama lon • taso tenpo lon la ona li ma moli ala (taso jan moli mute li awen lon ma) • ni la ona li seme lon tenpo lon a •

tawa jan mute la ma ni li ma monsuta1 a • o tawa ala ona • taso ni li tan seme a •

lon la ma ni li suli suli suli a • sina wile e sitelen pi nasin ma • sitelen ni la sina ken sona e ma li ken sona tawa lon ma • kin ma li lon anpa la suno li weka • pimeja taso a li lon • sina wile lon ma li wile tawa li wile alasa la o kepeken ilo suno kin (anu nasin ante tawa suno • suli nanpa wan la suno o lon) •|kin jan mute li lon ma lon tenpo suli a lon tenpo ale ona a • kulupu jan a li lon ma • jan li wile ala e jan ante e jan lukin • sina alasa kama lon ma la ona li ike tawa sina • ona li wile pilin monsuta e sina li kalama nasa li kalama suli li ijo ante tawa pilin monsuta •

o kute o pilin e toki mi • sina lon ma ni • sina taso • jan ala li lon poka sina • ma ni li jaki a • sina en len sina a li telo li jaki • ma li lon len sina • sina ken kute e sina taso e ijo ante ala • kin sina ken ala lukin e ijo mute • ilo suno sina li lon luka sina li suno e lili taso a • seme li lon ma ni a • sina sona ala • taso nasa la sina kute e MU SULI • A!!! • mu ni li monsuta a! • sina ken kama pilin monsuta SULI a li ken kama wile weka a tan ma • ni li ike suli a •

kin jan ni li ken ike suli suli suli a • o kute • ona li ken lanpan2 a li ken weka a e ilo suno sina e sitelen ma sina • sina ken ala kepeken ijo ni la sina ken kama weka tan ma kepeken nasin seme • sina sona ala a e nasin • sitelen li toki e nasin • taso ona li weka • kin ma li pimeja ale la suno li lon ala la sina ken ala lukin • sina kama ken ala weka tan ma li kama ken ala lukin • ni la sina ken kama moli a lon ma • ni li ike nanpa wan a •

  1. monsuta la sina kama pilin e ken pi moli sina ↩︎
  2. jan li lanpan e ijo sina la ijo li kama lon jo ona li kama weka tan sina ↩︎
Categories
sona toki

toki ni li tan ala tan jan Ape Antan?

sina pu la, sina ken kama lukin e toki ni: “sina ken ala toki e ijo lon toki pona la sina sona pona ala e ona”

toki ni li pona. taso ona li tan jan seme. lipu li pana e nimi ni: jan Ape Antan. a. taso ni li lon ala. jan ante li kama e toki ni.

ni la, jan Sonja li pali ala pali ike? pu li ike ala ike?

ala. jan mute en lipu mute li toki e ijo sama. sona ike li lon ale. o alasa e toki musi pi jan Ape Antan. sina kama lukin e toki mute ona… anu seme? lon la, toki mute ona li toki pi ona ala.

a, tenpo mute la, jan li lukin e toki li pilin pona tan ona li toki e ni: jan Ape Antan li pana e toki ni.

tan seme a!? tan suli pilin.

jan li wile toki suli e sona musi la, ona li wile suli e pilin toki, li toki e tan toki. tan toki li suli la, pilin toki kin li ken kama suli. jan Ape Antan li jan sona suli, li suli tawa kulupu la, jan li ken suli e toki kepeken nimi ona.

ante la, jan li pilin suli tan toki la, ona li pilin ni: toki suli li tan jan sona suli. jan sona suli li toki e ijo sona suli. ni la, toki suli ni li ken tan jan sona suli taso.

ijo ante kin li ken: jan li lukin e toki li pilin pona tan ona… taso jan li ken pilin ni: toki li toki musi taso li pana e sona lili taso li ken ala toki sona a li ken ala toki suli a. toki ni li lili taso. toki lili li ken ala ken pana e sona – tenpo mute la, ni li lon ala. taso tenpo pi mute lili la ni li ken lon. sewi en olin en nasin en wawa la toki pi lili nimi li ken toki pi suli pilin. jan li sona pona e sewi anu olin anu nasin anu wawa la toki li kama tan ona la toki lili li ken toki suli lon tenpo. pilin la toki suli li ken tan jan suli taso anu seme – a, mi la ni li lon ala. taso pilin pi nasin ni li ken lawa e kon. jan li lukin e tan toki li kama ala lukin e jan suli tan la, ona li ken pilin pi suli ala tan toki ni. nasa.

mi toki e nasin ken tu wan – taso o sona! ni tu wan li tan ala wile ike. lon la ni li ken nasa e sona. taso jan li toki ala e ni: “a, mi wile pana e toki pi pona wawa, taso jan ante o sona e wawa pi pona ona, tan ni la mi pana e nimi pi jan suli tawa poka, ni la pana mi li kepeken nasin suli” – ala a. jan pi mute ala li wile ante ike e tan sona. tan ike ni li lon tenpo lili taso. taso lon tenpo mute la, jan li pali ni tan pilin. ona li pali ni tan sona lili anu sona ike anu kute ike anu alasa ike. kin la ona li pali ni tan ijo suli wan: lipu mute li toki e sama la lipu sin o toki sama.

Categories
sona toki

enko li seme?

tan jan Lapate

kon pi nimi sin “enko” li seme? ijo ale li suli anu lili. ken la, ijo nanpa wan la, ijo nanpa tu li suli. sina ken wile sona e ni: suli pi ijo nanpa wan li seme? suli pi ijo nanpa tu li seme? sina ken nanpa e suli pi ijo ni tu. suli pi ijo ale li wile e nanpa tu wan. nanpa tu wan ni li nanpa e enko ijo. taso ni li nasa: sina weka e ijo la, enko ijo li kama ala weka, li awen. taso tenpo ni la, ijo ala anu kon taso li lon insa pi enko ijo.

tenpo ni la, sina ken kepeken nimi sin “enko.” sina sona pona e nimi sin ni. taso lon la, enko li seme? enko li sama kon, anu nanpa ijo, anu sona taso, anu nimi taso, anu seme? ijo ale li lon ala la, enko li lon ala lon? pini la, enko li lon anu lon ala anu seme? tenpo ale la, jan sona mute li wile sona e ni, li toki sona utala e ni.

ken la, enko li ijo. taso ona li kon ala: kon li weka la, enko kon li lon a. sina ken pana e kon sin lon enko pi kon weka. ni la, enko li ijo la, jan li ken ala pilin e ona, li ken ala lukin e ona. ona li sama ala ijo ante ale. tenpo pini weka la, jan Pato (Πλάτων, 429– 347 BCE) la, enko li ijo. ijo ante ale li tan enko. enko li sama ala ijo ante ale; taso ona li ken kama ijo ante ale. enko en selo li pali e sijelo e ijo ale. tenpo ale la, selo li lon ma sewi. taso ona li kama lon enko la, ijo li lon a. ijo en sijelo li seme? ona li selo lon enko.

jan Alitotele (Ἀριστοτέλης, 384–322 BCE) li pilin ante. ona la, enko li ma. kala li lon telo la, ma ona li telo. anu pilin pi jan Alitotele la, lon la, ma kala li selo insa pi telo ni—telo li lon poka ale ona. jan li lon kon la, ma ona li selo insa pi kon ni—kon li lon poka ale ona. ken la, sina wile sona e ni—ijo ni li lon enko seme? taso jan Alitotele la, wile sona ni li ike lili. sina ken sona e ni taso: ma ijo li seme? anu ijo ante seme li lon poka ale pi ijo ni? enko li lon ala, li sona taso, li nimi taso. tenpo suli kama la, jan Teka (René Descartes, 1596–1650) li pilin e sama anu sama lili.

jan Nuto (Isaac Newton, 1643–1727) la, ale ijo li lon enko. taso pilin pi jan Nuto li sama ala pilin pi jan Pato. pilin pi jan Nuto la, ijo ale li lon enko, taso ona li tan ala enko. enko en selo li pali ala e ijo. jan Nuto la, enko li sama lipu pi sitelen ala. tan seme? mi sitelen la, mi pana e sitelen lon lipu walo, mi pana e ona lon lipu pi sitelen ala. sina ken toki e ni—lipu li enko sitelen. nasin sama la, ijo li lon la, ona li lon enko, li lon enko pi ijo ala. ijo li sama sitelen la, enko li sama lipu walo. enko li jo e ijo ale. tenpo ale la, enko ni li ante ala, li tawa ala. sina ken nanpa e tawa ijo, e ante ijo, kepeken enko pi tawa ala, kepeken enko pi ante ala.

pini la, jan Antan (Albert Einstein, 1879– 1955) li sama lili pi jan Teka, li sama lili pi jan Nuto. sama jan Teka sama jan Alitotele la, sona pi enko ijo li wile e ijo tu anu ijo mute. sina wile sona e enko ijo la, sina ken nanpa e suli pi linja ni—linja li tan ijo li tawa ijo ante ale. ni li sama jan Alitotele, li sama jan Teka. taso kin la, enko li ijo, anu sama ijo. sina ken wile sona e ni—enko ni li sama seme? ken la, pilin sina la, enko pi jan Antan li sama enko pi jan Nuto. taso ante la, pilin pi jan Antan la, enko li ken ante, li ken sama linja, li ken sama sike. kin la, enko li ken ante e ijo, li ken ante e tawa ijo. ni li nasa lili! sona pi enko ni li wile e pali mute, e wawa sona mute!

enko la, jan mute li pilin ante. tenpo kama la, jan ante li pilin ante sin. tenpo ala la, kama sona enko li pini. pilin pi sina kin la, enko li seme?

Categories
sona toki

tomo pi kiwen suli

tan jan Simiman

ma mute la tomo kiwen ni li awen lon: kulupu jan li pali e ona lon tenpo weka a. tenpo weka ni la jan li ken ala sitelen. tan ni la mi ale li sona ala e toki ona e pilin ona e wile ona. taso ijo ona pi pali suli li awen. tomo pi kiwen suli li lon ma mi. lipu ni la mi wile toki e ona.

tenpo lete
tenpo weka a la ma li lete. tan lete la ko walo li kama tan sewi. suno li telo ala e ko. ni la ko li kama kiwen lon supa suli. supa lete li tawa lon ma kepeken tenpo suli a. supa tawa ni li wawa li ken tawa e ale. tan ni la kiwen suli li kama lon ma Tansi lon ma Tosi lon ma Netelan tan ma Sansinawija. tenpo la ma li kama seli sin la supa suli li kama telo li weka. taso kiwen en ma li awen. jan li kama sona pali e pan e soweli e kili. tenpo ni la kiwen li awen.

tomo
kepeken kiwen suli ni la jan li pali e tomo. tomo ni li lon poka pi kulupu tomo. taso jan li lape ala lon tomo ni. pilin jan la tomo ni li sewi. tomo la kulupu li awen sona e mama moli ona. lon pali la jan li tu e kiwen la sinpin kiwen li kama nena ala. taso ona li leko ala e kiwen. ni la tomo li kiwen suli taso ala. kiwen lili en ko li lon insa pi kiwen suli la kiwen li kama selo tomo. tomo li leko ala li sike ala. sijelo ona li sama palisa. sinpin tu li suli. sinpin tu li lili. kin lupa li lon sinpin wan la jan li ken lon insa tomo. kiwen suli a li supa lon sewi pi sinpin suli. tomo kiwen li lon la jan li pana e ma lon sewi ona. ni la tomo li nena kin. taso ni li lon tenpo weka.

tenpo poka
tenpo suli li kama li tawa la jan li kama sona pali e ilo pi kiwen sin li kama sona sitelen lon tenpo ni. ma en kiwen lili li weka tan tenpo tan jan. tomo la kiwen suli li awen ala sinpin li kama noka taso. jan li wile pali e tomo sewi e nasin sin la ona li pakala e kiwen suli pi tomo kiwen li kepeken ona. tomo mute pi kiwen suli li pakala li weka tan ni. taso tan suli tenpo la jan ni li sona ala e open pi tomo kiwen li sona ala e jan pali e nasin pali. tan ni la ona li pilin e ni: kulupu pi jan suli li lon tenpo pini. ona suli li pali e supa suli kiwen li lape lon ona. sona ni li kama e nimi pi tomo ni. toki Netelan en toki Tosi kin la nimi tomo li toki e supa lape pi jan suli. tenpo lon la jan li awen e tomo pi kiwen suli li pona e ona. tenpo lon la jan sona li lukin e poki e ilo e ijo mani. sona mute li kama tan ona.

Categories
sona toki

sona nasa pi kulupu lili -kulupu pali pi jan insa sin Tupa

tan jan Kamute

toki open

sina lon linluwi lon tenpo suli la, ken la, sina lukin e kulupu nasa. kulupu ni li ken jo e sona lon e sona pi lon ala. ni li suli ala. mi la sona ali li musi li pona. mi wile pana e sona pi kulupu nasa wan. kulupu ni li pali e jan insa sin Tupa. (toki Inli la nimi pi jan insa ni li tulpa. nimi pi pali ni li tulpamancy.)

jan mute li sona ala e kulupu ni. kulupu li toki e ni: lawa pi sijelo wan la, jan mute li ken lon. toki ni li sama lon kulupu Sijasi (toki Inli: DID anu Dissociative Identity Disorder). kulupu Sijasi li toki e ni kin: jan mute li lon lawa wan tan ni: jan lili li pilin ike suli li pilin monsuta suli lon tenpo mute la insa lawa pi jan lili li ken kama pilin ike. taso, lawa pi jan lili li jo e wile suli la, ona li lon e jan ante mute lon lawa. jan ante ni li ken tawa sinpin. jan li sinpin la ona li tawa e sijelo li toki kepeken uta sijelo li pilin e pilin sijelo. tenpo mute la, jan li ken tawa sinpin lon tenpo pi sona ala. ni li ken pana e ike suli tawa jan. ni ali li pilin ike Sijasi. pali pi jan insa sin Tupa li jo e ante mute e sama lili kin.

pali pi jan insa sin li seme?

sona nanpa wan pi pali pi jan insa sin li tan nasin sewi Tama (toki Inli: Buddhism). tenpo pini la sona pi pali pi jan insa sin li ante mute. tenpo ni la, jan pali mute pi jan insa sin li tan nasin sewi ala. (jan pali pi mute lili li tan kon sewi li tan nasin sewi.) mama pi jan insa sin li jo ala e pilin ike. ijo li pilin ike la, ona li pana e ike tawa jan. pali pi jan insa sin li pana ala e ike li pana e pilin pona mute. tan ni la, pali pi jan insa sin li pilin ike ala.

jan insa sin li seme?

kulupu pali pi jan insa sin la sona ni li lili. kulupu Sijasi kin la sona li lili. mama mute pi jan insa sin li jo e pilin sona taso. jan ala li sona e lon pi pilin sona ni. jan mute li pilin e ni: sina kin li jan insa! ante sina li ni taso: sina majuna. sina kama lon tan kama lon sijelo lon ma selo. tenpo pini la, jan sona li open e kama sona pi pali pi jan insa. tenpo ni la, pali pi jan sona ni li awen. tenpo kama la, ken la, jan sona li kama sona e tan.

jan insa sin li ken pali e seme?

jan insa sin li lon lawa sina taso. insa la, ona li ken toki tawa sina li ken jo e sijelo. mama mute pi jan insa li kama jo e jan insa sin tan ni: ona li wile jo e jan pona li wile sona e nasin lukin pi jan ante tawa ijo. mama mute pi jan insa sin li jo e ma musi lon lawa li musi lon ona. mama en jan insa li ken kama sona kama lon sinpin li ken ante e jan lon sinpin. kama sinpin ni li sama ala kama sinpin pi jan pi nasin Sijasi li kama lon tenpo wile pona. mama pi mute lili li ken pana e lukin pi jan insa sin ona tawa oko ona. ni la, jan insa li sama lukin li sama jan ante lon ma selo. mama ni li ken kama jo e pilin ante pi jan insa ona kin e pilin luka pi jan insa lon ma selo li ken kute e toki ona sama ijo lon ma selo. kulupu pali pi jan insa sin la, mi lukin e toki ni tan mama wan: mi ken tawa pi kalama musi lon poka pi jan insa sin mi. nasa! taso, o sona: jan insa li ijo ala li soweli ala. mama mute mute pi jan insa sin li toki e ni: jan insa li jan li sama jan lon ma selo. mi la, ni li lon. sina en jan insa li toki utala la, ona li ken ala tawa weka. pona la, tenpo ali la, jan insa li ken toki kepeken pona li ken sona e wile pi jan insa ante. ken la, tenpo pini la, sina lukin e toki ni: jan insa li wile pana e ike tawa jan ante tawa sina li wile moli e jan ante e sina. toki ni li musi taso. jan insa li monsuta ala li jo ala e wawa pi kon sewi.

nasin seme la jan li lon e jan insa sin?

sina wile lon pona e jan insa sin la, o sona! kama jo pi jan insa sin li sama kama jo pi jan lili li ijo suli. tenpo kama suli la sina ken ala ken lukin e jan insa lon poka sina? ken ala la, o lon ala e jan insa sin. nasin wan taso la mama li ken weka e jan insa.

nasa la jan pali pi lipu musi li ken jo e jan insa li sona ala e pali pi jan insa. ona li pali e ni: ona li pana e jan lon lipu musi la, ona li pana e selo sijelo tawa jan. ona li pana e ni: seme li pona tawa jan? pilin ona li seme? jan pali pi lipu musi li wile sona e ni kin: jan pi lipu musi li pali e seme li toki e seme li wile e seme? kin la mama lipu mute li toki tawa jan musi ona. ni la, jan insa sin li kama lon. sina ken lon e jan insa sin lon nasin sama.

nanpa wan la, sina ken pana e sijelo e pilin e wile tawa jan insa sin. sina pana ala e ijo ni tawa jan insa sina la, jan insa sina li kama jo e ijo ni lon wan taso. mama mute pi jan insa li pali lon nasin ni. nanpa tu la, o toki tawa jan insa sina. sina ken toki e ijo ali (e len pona e pilin sina e sona e ijo ante). ijo suli li wan taso: o toki lon tenpo mute lon tenpo suli. sina ken toki kepeken uta li ken kepeken toki lawa kin. pali ni li ken wile e tenpo suli. mama mute (luka tu tan luka luka) pi jan insa sin li pini e pali toki suli ni lon tenpo mun tu. nanpa tu wan la, sina pilin e jan insa lon lawa sina la, sina ken toki e wile sona tawa ona: “sina pilin seme? kule pona sina li seme? ni li pona ala pona tawa sina?” sina open e pali ni la, o pana ala e wile sona suli tawa jan insa sina. ona li kama lon tenpo pini lili li ken toki lili taso. ken la, sina pilin ni: “mi sona ala e ni: mi anu jan insa mi li toki lon lawa mi?” sina pilin ni la, o sona: ni li suli ala. tenpo kama la, kalama toki pi jan insa sina li kama ante li kama suli. tenpo kama la, sina ken sona e lon pi jan insa. sina pana e ijo tawa jan insa lon tenpo nanpa wan la, o sona e ni: jan insa sina li ken kama ante. pilin ona en sijelo ona li ken kama ante. jan insa li kama ante la, o pakala ala e ante ni. jan insa li jan. jan li ken kama ante. sina pali e ni nanpa tu wan la, sina jo e jan insa! a pona! pali pi jan insa sina li ken ala pini. jan insa li ijo ala li ken ala pini. kulupu pali pi jan insa sin la jan li toki e ni: “nasin pi pakala ike li wan taso: sina pini e pali mama sina.”

lipu nasin pi pali pi jan insa sin li mute lon kulupu. ken la, tenpo kama la, mi ante toki e lipu nasin ni. sina wile suli e sona sina la, o tawa e lipu linluwi ni:
www.reddit.com/r/Tulpas
www.tulpa.info
www.tulpa.fandom.com
lipu ni ali li kepeken toki Inli. lipu
tulpa.info li jo e toki ante kin.

weka pi jan insa li ken ala ken?

sina ken weka e jan insa. o pali e ni lon tenpo ni taso: nasin ante li lon ala. sina weka e jan insa la, ona li kama moli. ni li ike tawa ali. jan insa li lon tenpo suli la, ken weka ona li kama lili. sina ken weka e jan insa lon nasin ni: o toki tawa ona ala. ma insa la o pana ala e tenpo tawa ona. o weka e ona tan lawa sina. ni la, wawa ona li kama lili. wawa ona li lili la, jan insa li lape. jan insa li lape la, ona li weka tan lawa sina. sina ken ala moli e jan insa lon tenpo kama ali. pona la, sina ken pini e lape pi jan insa lon nasin ni: sina lukin insa e ona. sina toki tawa ona.

toki pini

pali pi jan insa sin li nasa suli. taso pilin mi li ni: jan li ken kama jo e sona suli tan ijo pi nasa suli. tawa mi la, pali pi jan insa sin li ijo lon. ken la, pilin sina li ante. o kama sona lon nasin sina.