tan jan Alonola

mi ale li sike e suno,
mi ale li oko e laso,
mi ale li moku e telo,
mi ale li moli.

mi ale li moku, li lape, li seli,
mi ale li tonsi, li mije, li meli,
mi ale li soweli.

mi ale li alasa e lon pona,
mi ale li ona:

ona li pona ala lon tenpo ale,
mute la, ona li ken ala lape,
ona li jo ala e ike ala,
ona li nasa.

taso ona li mi ale,
mi ale li sama,
sina li taso ala.

tan jan Alonola

sina lili lon tomo sona la,
sina sona e nanpa lili a.
ken la, sina sona e mi;
mi la, mute en luka li suli.
mi lon poka wan;
mi lon poka san.
nimi pali mi li sama “kipisi”
pona en ike, ku en pu li mi.

tan kije Enki

tenpo pi mi jan lili la
mi kama pilin pakala
pakala li lon insa la
mi toki e ijo ala
jan li wile sona e mi
taso mi toki lon ala
mi lili li toki suli
pona taso, ike ala
a taso tenpo ni a la
ale li pini ike la
li poka kama pakala
en musi ike pakala
tawa wawa a a a la
mi monsuta
tawa anpa
mi pini sona e pini
ike taso, pona ala

ante toki pi “Як дитиною бувало…” tan jan Ukwainka (Леся Українка)

tan jan Kapesi Pake

tenpo pini lon leko¹ la
mi lukin e jan pi lon ala.
ona li weka kin lon ni.
o tawa, tawa a tan mi!

mi kama lon tenpo lape
la jan nasa ni li awen.
taso, mi alasa oko
la ona li weka tan tomo!
“o weka! o weka! o kama kin ala!
o weka! o pakala ala e lupa…” (a!)

pimeja la lon leko la
mi lukin e jan pi lon ala.
ona li weka kin lon ni.
jan o tawa weka tan mi….

1 ni la, “leko” li sama supa

ante toki pi “Antigonish” tan
jan Men (William Hughes Mearns)