pali moku li musi mute a! ijo ale a li ken lon tomo moku. sina sona ala sona pona e pali moku? ni li suli ala a! nasin mute li lon. sina ken pali e ijo ale pi wile sina. ni la sina ken pali e moku sin pi pona mute.

taso sina o pali e moku kepeken nasin seme?

lipu sona mute pi pali moku li lon. sina kepeken e ona la sina kama jo e sona sin. sitelen tawa en lipu linluwi kin li ken pana e sona sin. ken la sina ken pali moku lon poka pi jan ante. ni la sina mute li ken kama sona e nasin pi jan ante kin.

taso musi li ken kama tan seme?

o sona taso ala. o pilin e ken ale! lipu pi sona moku li toki e ijo. taso sina ken tawa nasin sin! o sin e nasin sina pi seli moku. o kepeken e ijo moku sin kin. o kepeken e ijo moku suwi mute e ijo moku namako mute. lukin moku li suli tawa musi kin. sina pali e lukin pona tawa moku sina la pilin moku li kama pona. sina ken kepeken e ijo moku pi kule wawa!

pini la o sona e ni: sina pali musi e moku la moku li ken ala kama pona lon tenpo ale. taso o pilin ike ala! nasin ni la sina kama sona e ni: ijo seme li pona li ike lon tomo moku. sina ken pali pona lon tenpo kama kin.

sina wile ala wile moku? a pona – ni la o kama. mi pana e moku tawa sina. mi pana e moku suli! a, sina wile sona, ona li suli seme? suli tenpo a! ona li tan tenpo pini. moku ante ala li ken awen lon tenpo sama ona. seme? a, ala, ala, ona li jaki ala. lon la tenpo li tawa moku la tenpo li jaki e moku… taso ni li lon moku ante taso li lon ala moku ni a! sina wile sona anu seme? a ni la o kute. o kute e tenpo pi moku ni!

o pilin e tenpo ni. sewi la mun mute li kama tawa ante. tenpo pi jan wan li lili a tawa tenpo pi toki ni. tenpo la kulupu jan mute a li kama li weka li pali e tomo mute lon ma wan li pakala e tomo ni ale li ante mute e toki ona. taso moku ni li awen, li kama ala jaki li awen pona moku. ni li ken tan seme? jan seme li sona pali e moku pi nasin ni?

pipi a li pali e moku ni. ona jelo pimeja li alasa waso e kasi kule e kule kasi e suwi kasi. suwi li kama lon insa pipi la suwi li kama ko suwi jelo pona. pipi li tawa tomo ona. pipi mute li ni la ko li kama mute lon insa pi tomo ona.

ijo lili jaki li lon moku la moku li kama jaki suli lon tenpo. taso ko li ken utala e ijo jaki. insa pipi li ante e ko li pana e ken utala ni tawa ko. ni la jaki li ken ala awen pona lon ko li moli. kin la ijo jaki awen li wile e telo. lon la ko pipi li jo e telo mute lon tenpo open. taso pipi li weka a e telo tan ko kepeken lipu waso ona.

tan ni la ko li ilo pona. pipi lili la ona li moku pona. uta sina la ona li moku suwi. selo sina li pakala la ona li ken awen weka e jaki. ko li ken ijo ante mute kin. suli la ko li ken awen lon tenpo suli a. ona ale li awen ala awen? ala a. jaki mute li kama la ko li ken ike. telo li kama la ko li ken kama ike. kon en ijo en tenpo li lon ona la ona li kama ike. sina wile awen e ko la o poki pona e ko. o selo e poki. telo ala en kon ala o tawa ko. ni la ona li ken awen. ni la sina ken moku e ona lon tenpo kama. sina mama e jan sin la ona li ken moku. ona li mama e jan sin la jan sin li ken moku. ona li mama la jan sin ona li ken moku. kulupu sina li mama e kulupu sin la ona sin li ken moku. ko ni li ken awen a lon tenpo suli a.

mi jo e poki ni. ko li awen pona lon insa ona. mi open ala e ona lon tenpo pini. ala li open e ona. ona li ken awen awen lon tenpo suli. taso mi open e ona la ona li ken ala awen.

sina open ala open e poki?