Categories
kulupu toki

lipu tenpo li kulupu

tan jan Alonola
tan jan Sonatan

o sona! lipu tenpo li kama kulupu lawa. tenpo sike tu wan pini la, mi open e lipu tenpo. mi pana e lipu tenpo nanpa wan. tenpo li kama la mi kama kulupu pona li pana e lipu tenpo mute.

tenpo pini lili la, kulupu pi lipu tenpo li kama kulupu lawa lon ma Tosi. toki Tosi la nimi ona li lipu tenpo e.V. (eingetragener Verein). ni li pona mute tawa mi, li pona mute tawa jan pali pi lipu tenpo. ni la, kulupu pi lipu tenpo li ken pali e ijo mute. mi wile toki e ijo ni.

lipu tenpo li ken jo e poki mani. ni la, lipu tenpo li ken pana e mani tawa jan pi pali musi anu jan pi ilo musi. mani o suli e kulupu pi pali musi pi toki pona. ken la, mi ken kepeken mani tawa tenpo kulupu pi ma Elopa. ijo mute li ken a.

suli la, kulupu li jo e lipu tenpo. jan wan taso ala li jo e ona. kulupu li wile ante e lipu tenpo la, kulupu li lawa e ona. jan li wile kama jo e mani la, kulupu li ken pana e mani.

tenpo kama la, mi wile toki tawa kulupu lawa suli tan ni: kulupu lawa suli Tosi en kulupu lawa suli Elopa (EU) li pana e mani tawa kulupu lawa lili. kulupu lawa suli li wile e ni: jan li kulupu li pali e pona kulupu e pona musi. mi la, lipu tenpo li pali e ni. ken la, mi ken kama jo e mani tan ni li ken suli e pali pi lipu tenpo.

tenpo ni la, jan Sonatan en jan Alonola li lawa e lipu tenpo. tenpo kama la, sina ken kama lawa e ona! sina ken lon kulupu pi lipu tenpo. ni la, sina ken toki e wile sina. tenpo sike la, jan li kulupu, li toki e wile ona, li kama e jan lawa sin. 

lipu tenpo li open e kulupu lon ma tomo Mase (Maastricht). ona li kama lon tenpo sike nanpa 2023 lon tenpo mun nanpa 7 lon tenpo suno nanpa 27. ni la, mi toki tawa jan pi sona lawa. ona li pona e lipu lawa pi lipu tenpo. mi pana e mani lili tawa ona. jan pi sona lawa li pana e lipu tawa kulupu lawa. taso nasin mi li pini ala: mi o open e poki esun, o toki tawa kulupu lawa ante mute, o pana e lipu mute!

mi ale li wile e ni: sina ken kama jo e lipu tenpo lon. sina ken esun e lipu tenpo lon lon lipu Petilon (Patreon) kepeken mani lili. lipu tenpo li wile ala jo e mani mute, taso mi pali li pana e lipu kepeken mani. suli la sina lukin taso e lipu la ale li awen sama suli.

Categories
kulupu toki

lipu tenpo li lon selo sin

tan jan Kasape

lipu tenpo li kama sin a · mi mama pi kama ni · mi
ante e lipu tan seme · open la lipu tenpo li jaki oko ·
ona li pana e pilin ni : jan sin li pali e ona · jan li kama
pilin e ni la toki pona li ken kama lili tawa ona · mi wile
ala e ni · tan ni la mi wile sin e lipu · lipu o pona oko ·
mi kama pali · mi pali lon lipu la mi weka e ike · ijo li
wile ala la mi weka e ona · tawa mi la ni li pona · taso
jan li toki e ni : ni la mi weka e ijo musi kin · tan ni la mi
pana e musi ante tawa ona · mi awen pali · seme o
awen · seme o weka · toki kulupu li mute · pali li pini
ala tan ni · lipu li awen kama ante ·
tan ni la mi wile sona e toki pi sina kin · selo sin li seme
tawa sina · o toki e pilin sina tawa mi · lipu li tawa
kulupu · kulupu a o olin e lipu tan ni · ni li suli · o kama
oko e lipu o kama toki ·

Categories
kulupu toki

jan pi toki Sonko li toki pona la seme li sin lon kulupu ona人之言Sonko兮言善时何兮新于团伊

tenpo ale la mi kute e ijo pi toki pona tan kulupu pi toki Inli. ni li ike ala tawa mi, taso kulupu ante kin li lon. kulupu ante li lili, taso ona li awen toki pona. ni li wawa tawa mi. mi kama sona e ijo sin pi kulupu ni wan. kulupu ni li toki Sonko li toki pona. jan Nape pi kulupu ni li toki e ijo sin tawa mi. taso mi wile toki e ijo sin la sina o sona e ijo tenpo.

sama tenpo sike pini luka luka la, kulupu pi toki pona li kama tawa ilo pi toki Sonko. jan Teli li open e kulupu ni. jan li open e kulupu la ona li ken lawa ale e kulupu. taso jan Teli li kama ala awen lon kulupu. lukin la, ona li weka tan kulupu. kin la, ona li kama sona lili taso e toki pona lon tenpo open, li kama ala sona toki pona. taso jan ante li lon kulupu la, kulupu li awen.

tenpo la, nasa li kama tan jan Teli. ona li utala e ijo lili pi suli ala, li pana e pilin jaki tawa kulupu. tenpo sike pini tu la ona li utala sin e ijo pi suli ala.
toki Sonko la, jan kulupu pi mute ala li kama kepeken sitelen Lasina. sina sona e ni: toki Sonko la, sitelen Sonko li lon, li sama ala sitelen Lasina. taso jan li wile sitelen Lasina e toki Sonko la, nasin ken li lon. taso ni li ike tawa jan Teli. ona li weka e toki Sonko pi sitelen Lasina, li pana e lawa sin: o sitelen Lasina ala e toki Sonko, o toki ala kin e sitelen Lasina pi toki Sonko. jan Teli li weka kin e jan pi nasin ni tan kulupu. ni li jaki. jan Teli li weka lon tenpo ante li utala e ni taso anu seme? jan weka li open e kulupu sin pi toki pona.

jan Nape pi kulupu Sonko pi toki pona li pilin e ni: “mi mute sona ala e ni: tan seme la jan Teli li pali e ni? ken la jan Teli li wile kepeken e wawa pi ona taso. ike mute. jaki mute.” jan Teli li toki e tan pi pali ona la, ona li toki e ijo nasa, e sona pona ala, li wile ala kute e jan ante.

tenpo sike ni la ike li kama tan jan Teli. ona li kama toki e pini pi kulupu ona. lon la, ona li ken pana e ken lawa ona tawa jan ante. kulupu li toki e ni tawa ona lon tenpo mute. lukin la jan Teli li kute e kulupu:
nasin li lon a. kulupu ni li ken awen a. jan lawa sin li ken kama.
taso lon la, ona li kute ala. kepeken tenpo suno pi mute ala la, ona li pini e kulupu. kulupu li kulupu pi tenpo suli. taso ni la ona li ala. pini ni la, jan Teli li weka li awen weka.

pona la, jan kulupu li ken lon kulupu sin. taso ona li pilin ike. ni kin li pilin pi jan Nape:
ijo ni li ken kepeken nasin pona a. nasin ni la, ijo ala li kama weka tan jan Teli. nasin li wile e tenpo lili taso. kulupu li toki ale e nasin pona tawa jan Teli. nasin ale la nasin ni li pona mute. taso, jan Teli li pali ala e ni, li toki ala e ni: tan seme la ona li pali ala e ni. jan Teli li weka e kulupu ni tan ala a.

Categories
kulupu toki

jan pi toki pona li kulupu lon ma tomo Mase

sin la jan pi toki pona li kulupu a. tenpo sike pini la mi tawa ma tomo Win tan ni: jan Ke Tami li open e tenpo kulupu pi ma Elopa. jan li toki li musi li kama sona e jan ante pi toki pona.

tenpo sike ni kin la jan Ke Tami li pali e tenpo kulupu lon ma tomo Mase (Maastricht) lon ma Netelan. ni la tenpo mun pini la jan pi toki pona li kulupu lon tenpo suno luka. jan kulupu li kama tan ma mute pi ma suli Elopa. kulupu pi ma Win la kulupu pi ma Mase li suli a.

tenpo suno nanpa wan la jan mute li kama lon kulupu. jan ale li kama sona e jan sin li toki pona mute. mi kin li kama lon pini pi tenpo suno ni. mi pilin pona tan ni: mi sona e jan mute tan tenpo kulupu lon ma tomo Win.

tenpo suno nanpa tu la mi ale li tawa ma selo pi ma tu wan ni: ma Tosi en ma Netelan en ma Pekije. telo mute li kama anpa lon tenpo mute. taso mi pilin pona kin tan ni: mi kama sona e jan sin mute. mi ale li musi kin e musi toki pi jan Ke Tami e musi lipu ante.

tenpo mute la lipu tenpo li wile wawa e kulupu ona. tenpo ni la ona li ken ni. jan Alonola en mi li toki e ni tawa kulupu pi lipu tenpo: mi o kama kulupu pi lawa Tosi. ni la kulupu o ken jo e mani ona e lawa ona.

tenpo kulupu pi ma tomo Mase la jan mute ni pi lipu tenpo li lon: jan Alipi en jan Alonola en jan Ke Tami en jan Peja en mi. mi toki tawa jan ante kin pi lipu tenpo kepeken ilo toki mi. ni la mi ale li toki e ni: mi wile lon kulupu pi lipu tenpo li wile jo e lawa kulupu li wile e ni: jan Alonola en jan Sonatan li jan lawa pi kulupu ni. kin la mi toki e ijo suli ante pi lipu tenpo. ni ale la kulupu pi lipu tenpo li kama wawa.

tenpo suno nanpa tu wan la mi toki e ni tawa jan kulupu: jan sitelen toki pi lipu tenpo li sitelen toki kepeken nasin seme? ni la jan li pilin e ni: mi kin ken pali lon kulupu pi lipu tenpo a. tenpo suno sama la kulupu suli li tawa tomo pi sitelen tawa li lukin e sitelen tawa Papi (Barbie).

tenpo suno nanpa tu tu la kulupu li tawa lupa suli lon anpa ma. tenpo pini la jan li kama jo e kiwen mute tan ona. tan ni la lupa li awen. tenpo ni la mi ken kama sona e tenpo pini pi ma tomo Mase tan insa pi lupa ni. sona ni li pona tawa mi a.

tenpo suno nanpa luka la mi mute li lukin e sitelen toki li musi. kin la mi ale li pana e ijo tawa poki tan ni: tenpo kulupu li kama pini a. jan li tawa ma ona lon tenpo sin.
tenpo ni ale la kulupu li toki mute kepeken toki pona li toki lili kepeken toki ante. jan ale li pilin musi tan ni. jan mute li wile kulupu lon tenpo sike kama kin a.

Categories
kulupu toki

utala musi pi sitelen toki

toki pona li musi · ijo pi toki pona li musi · pona la jan mute li pali e ijo pi toki pona li pana e musi tawa mi · a · taso ijo pi toki pona la mi sona e ike lili wan · ijo mute li kama ijo pi toki pona li tan ala toki pona lon tenpo open · ijo ni li tan toki ante · ni li awen musi · musi li awen musi · taso ijo li tan toki pona taso la ni li suli e kon musi tawa mi · tan ni la pilin mi li lon · ijo sin o tan toki pona taso tan ala toki ante · 

mi taso ala li pilin ni · jan ante li sama · jan ni wan li jan Lakuse li wile kama e pali · ona li pana e wile ona tawa ale kulupu · jan o sitelen e ijo sin kepeken toki pona lon toki pona tawa toki pona tan toki pona taso · ijo o musi · ni la utala musi o open · kulupu o pana e toki ijo mute · 
ni li kama lon tenpo sike pini · lipu musi sin li kama li pona wawa a · mi lukin e ona ale li pilin pi musi suli tan ona · mi toki e kama ni lon lipu pini · taso ni li kama sin lon tenpo ni a · utala sin li lon · sin la o pana e musi a tawa mi ale · o tawa lipu https://utala.pona.la/ · ni la sina wawa e musi ·

Categories
kulupu toki

jan Eli li tawa

jan Sonatan

tenpo sike tu pini la mi toki tawa jan pi toki pona lon lipu Wesi tan ni: mi wile pali e lipu tenpo. jan mute li kama li toki kepeken tenpo lili. jan Eli li kama kin. taso ona li toki taso ala. jan Eli li pali e ma Siko tawa lipu tenpo. ni la kulupu pi lipu tenpo li ken kama lon. jan Eli en mi li lawa e lipu tenpo lon tenpo mute. mi tu li pali lon tenpo pona li pali lon tenpo ike. tenpo ale la jan Eli li jan pona li pona e lipu tenpo a.

jan Alonola

jan Eli li toki e toki Posuka, e toki Inli, e toki pona, li toki lili e toki Tosi. jan Eli li meli tonsi wawa. ona li ken pona lawa. ona li ken pona sitelen e toki nanpa. mi en jan Eli li toki mute. mi tu li ken toki e toki Posuka. ni la, mi toki e toki Posuka, li toki lili e toki Inli. mi pilin e ni: jan Eli li jan pona mi. jan ale li pilin e ni: jan Eli li pona. tenpo ni la, jan Eli li wile ala lawa kin e lipu tenpo. jan Eli li tawa tan lawa pi lipu tenpo, taso ona li awen lon poka pi mi mute.

jan Sonatan

tenpo mute pini la jan Eli en mi li kama sona e ni: jan Alonola li jan pona li jan pi pali pona mute. tenpo ale la ni li awen lon. tenpo ni la ni li lon. kin la jan Alonola li wile e tenpo kama pona tawa lipu tenpo. ni ale la mi sona e ni: jan Alonola li ken lawa kin e lipu tenpo.

jan Alonola

lipu tenpo la, jan lawa tu li lon. tenpo pini la, jan Eli en jan Sonatan li jan lawa. jan Eli li jan lawa ala la, jan lawa sin o lon. jan Eli li wile e ni: mi o jan lawa. ni la, tenpo ni la, mi jan lawa nanpa tu pi lipu tenpo lon poka pi jan Sonatan. mi tu li wile pali e ijo mute!

jan Sonatan en jan Alonola

jan Eli o, powodzenia! jan Eli o tawa pona o awen pona!

ijo mute li ante lon tenpo ni. ijo mute li ante lon tenpo kama. tenpo kama lili la, kulupu pi lipu tenpo li open e kulupu lawa ona pi lawa Tosi. kulupu ni li lon la mi o toki e sona sin. tenpo kama la ijo mute pona li kama!

Categories
kulupu toki

tenpo sike tu

tenpo sike tu li pini. tenpo sike tu la, mi mute li pali, li musi, li sitelen, li toki, li lukin, li kulupu. tenpo sike tu pini la, mi mute li open e lipu tenpo, e kulupu ni. tenpo sike tu la, ijo mute li ante, taso lipu tenpo li awen.

open la, mi wile toki e ni: kulupu ni li suli tawa mi. kulupu ni li pana e sona mute tawa mi. mi kama sona e ijo mute lon kulupu ni. kulupu ni li ante e mi. mi wile e ni: mi ante e ma lon poka pi kulupu ni. mi pali mute e musi, e sitelen, e toki, taso lipu tenpo li ijo nanpa wan mi. jan lukin pi lipu tenpo o, sina pona. jan pali pi lipu tenpo o, sina pona tawa mi, tawa jan ale.

tan jan Kuwimaku

open la, mi ale li jo ala e nasin. taso mi ale li pona. jan pona li ken pali e ijo suli. jan Eli en jan Sonatan li lawa e lipu tenpo, li pana e nasin pona. jan Kuwimaku li pali e sitelen pi lipu tenpo. ona en jan Ke Tami en mi en jan ante li pali e sitelen mute tawa lipu tenpo. open la, jan Telakoman en jan Olipija en jan Sose en jan Ke Tami en jan Kapesi Paki en mi li pali e toki mute. jan Peja en jan mi li pali e lipu linluwi pi lipu tenpo. jan Simo li pali e sitelen sinpin ale a! 

tenpo sike wan li pini la, lipu tenpo li awen lon. pona la, toki pona li jo e nimi lili “tok” tan kulupu ISO! mi pilin e ni: lipu tenpo li suli tawa nimi lili ni. ken la, lipu tenpo ala la, toki pona li jo ala e nimi lili “tok”.

sina lukin mute e lipu tenpo la, sina sona e toki sike (toki sike li lon lipu tenpo mute). mi mute li lukin e sitelen musi “kijetesantakalu o!” mute tan jan Ke Tami. mi mute li lukin e toki “tawa pi poki monsi” mute tan jan Polo. mi mute li lukin e toki nasa “seme li mi” mute tan, a, mi. 

tenpo sike tu li pini lon tenpo pini. mi jo e pilin pona mute. tenpo pona en tenpo ike li kama. mi ante mute, ale mi li ante mute. taso kulupu ni li lon poka mi lon tenpo ale. sina pona.

mi wile e ni: lipu tenpo li awen lon tenpo sike mute kama!

Categories
kulupu toki

ma ilo Wijasa

ken la, sina wan en sina ante pi toki pona li wile kama lon ma sama li wile kama kulupu. taso sina wan taso li lon ma sina la, ni li ike. sina wile tawa ma weka la, sina wile e mani, e tenpo kin. ken la, ni li pana e pilin ike tawa sina. wile kulupu li ken ala kama e kulupu pi toki pona lon tenpo mute. ike a. tan ni la, sina awen toki pona kepeken ilo taso lon ala ma sama. sina kama ala lukin e sijelo pi toki pona e tawa pi toki pona e pilin sinpin e ma kulupu e kulupu suli e musi mute.

taso nasin ante li lon. nasin pi toki mi la, sina awen kepeken ilo, taso sina en kulupu pi toki pona li lon ma sama wan li ken lukin e sijelo e tawa e pilin e musi. ma pi toki mi li ma ilo a. ma ilo ni li ma Wijasa (VRChat).

ilo seme li ken

ma ilo la, sina tawa kepeken sijelo. taso sijelo ni li sijelo sina ala li sijelo sitelen ilo. sina wile tawa e sijelo ilo la, nasin tu li lon.

nasin nanpa wan la, sama musi ilo ante la, sina kepeken ilo sona suli sina. ilo tawa luka en ilo pi nena mute li ken tawa e sijelo ilo sina li ken tawa e oko sina.

nasin nanpa tu la, sina ken kepeken ilo oko a. sina pana e ilo tawa oko sina la, sina ken lukin e ma ilo kepeken ala sinpin sitelen kepeken oko taso. kin la, sina ken tawa e sijelo ilo sina kepeken sijelo sina pi ilo ala.

jan Kekan San li pana e sona

sina kama tawa ma ilo pi toki pona la, seme li lon tenpo kulupu? sona sina pi toki pona li open anu lili la, sina ken kama sona toki pona. sijelo mute li ken pana e sona tawa sina, taso tenpo mute la, jan Kekan San li pana pona e sona suli pi toki pona. ona li toki lon tenpo sona suli li sona pana e sona kepeken nasin pona a. sina lon ala ma ilo kin la, sina ken lukin e tenpo sona ona lon lipu Jutu pi sitelen tawa.

toki en tawa

taso suli la, sina tawa ma ilo pi toki pona la, sina wile toki pona a! pona la, sina ken toki tawa sijelo mute. ken la, sina toki tawa uta ante lon ilo ante kepeken kalama sina. ken kin la, sina kama lukin e sinpin ona e sijelo ona. taso ma ni la, sina ken tawa a. sina ken tawa lon ma lon nasin lon telo. sina ken tawa e luka sina. sina ken tawa e ijo kin pi ma ni. sina ken sitelen e linja lon kon. ale ni la, nasin toki li kama pona pi wawa mute a!

musi mute li lon

taso toki taso li pona ala tawa sina la, ijo ante kin li lon. sina ken musi. sina ken tawa ma musi ilo mute. ona la, musi ante mute li lon. musi toki pi tenpo lili la, sina ken toki tawa sijelo wan lon tenpo lili taso li toki sin tawa sijelo ante lon tenpo ante. musi pi ilo tawa la, sina ken tawa e ilo li ken pakala e ilo pi sijelo ante. musi sike mute la, sina ken tawa e sike lon kulupu. musi sike ante la, sina taso li tawa e sike sama sijelo ante ale. musi pi poki awen la, sina ken jan lawa li ken jan ike. sina jan ike la, sina wile weka tan tomo poki. sina jan lawa la, sina wile pakala e weka pi jan ike. musi ante mute kin li lon. musi ale li lili la, ni kin li pona tawa toki kulupu. kin la, musi lili pi toki pona li lon ma kulupu pi toki pona li musi Soweli.

a ken la, ma ilo li nasa tawa sina. mi open e lukin mi tawa ma musi ilo la, ona li nasa tawa mi. taso mi awen kama, mi awen lukin, mi toki tawa kulupu, mi pilin pona lon ma nasa musi ni. ona li ken musi pona tawa sina kin.